Grianghraif

Pádraig Ó Súilleabháin (le caoinchead Chnuasach Bhéaloideas Éireann, An Coláiste Ollscoile, BÁC)

Nóta beathaisnéise

Ó Súilleabháin (Sullivan), Pádraig (Pádhraic, Patrick, Patt) (1864-?): Rugadh é i mBaile an Tobair, contae na Gaillimhe, ar an seachtú lá de mhí na Nollag 1864. Ba iad Mícheál Ó Súilleabháin, feirmeoir, agus Neilí Nic Giobúin a thuismitheoirí. Bhí beirt mhac agus triúr iníonacha sa teaghlach. Ní bhfuair Pádraig aon bhunscolaíocht fhoirmeáilte riamh, ach chuaigh sé go dtí scoil oíche ar feadh trí mhí agus é 22 bliain d'aois. B'fheirmeoir é. Agus é óg, théadh sé lena mháthair go dtí na margaí ag díol bréidín. Tar éis dó pósadh, chaith sé dhá bhliain ag obair ar an mbóthar iarainn idir Gaillimh agus an Clochán. Théadh sé abhaile ar feadh seachtaine leis an bhfómhar a bhaint, le móin a bhaint, agus le fataí a bhaint. Chaith sé seacht mbliana eile ag dul go Sasana go séasúrach. Ina dhiaidh sin, chuaigh sé go Scranton Mheiriceá ag obair mar mhianadóir ar feadh dhá bhliain. D'fhill sé ar Éirinn ar feadh bliana roimh dhul go Pittsburg. Bhí sé ag obair mar thógálaí ansin. Bhí Pádraig ina chónaí i gCorr na Móna, i gConga, contae na Gaillimhe, i 1930. Bhí muintir Shúilleabháin i nDubhachta, i gConga, contae na Gaillimhe, le linn dhaonáirimh 1901 [http://www.census.nationalarchives.ie/reels/nai000837377/] agus 1911 [http://www.census.nationalarchives.ie/reels/nai002429329/]. Phós sé Máire Ní Dhroighneáin timpeall na bliana 1891, nuair a bhí seisean 26 agus ise 22. Bhí cúigear iníonacha agus cúigear mac ar fad acu. D'imigh ceathrar iníonacha agus ceathrar mac go Meiriceá. Fuair a bhean chéile bás i samhradh 1940. Fuair Pádraig féin bás am éigin tar éis mhí Iúil 1947. Tá roinnt mhaith ábhar béaloidis a bailíodh ó Phádraig Ó Súilleabháin ar fáil i gCnuasach Bhéaloideas Éireann, COBÁC. I measc an ábhair sin tá cuntas a bhailigh Proinnsias de Búrca uaidh ar a shaol féin.

Foirm Eolais Phearsanta ('Personalbogen')