Nóta beathaisnéise

Ó Ceithearnaigh (Carney, Ó Ceárna), Máirtín (Martin) (c.1863-?): Ar an gCloch Bhreac, an Fhairche, contae na Gaillimhe, a rugadh Máirtín Ó Ceithearnaigh timpeall na bliana 1863. Ní bhfuair sé aon scolaíocht fhoirmiúil riamh. B'fheirmeoir é a athair agus b'fheirmeoir agus mairnéalach é féin. Ba í Bridget Carney a mháthair. Bhí sé ina chónaí ar an gCloch Bhreac le linn dhaonáirimh 1901 [http://www.census.nationalarchives.ie/reels/nai000836981/] agus 1911 [http://www.census.nationalarchives.ie/reels/nai002428707/]. Phós sé Margaret Carney timpeall na bliana 1888. Bhí beirt iníonacha agus mac amháin acu. I gCnuasach Bhéaloideas Éireann, tá cur síos ag an mbailitheoir Proinnsias de Búrca ar an gcéad uair a chas sé le Máirtín, agus é ag iascaireacht, i 1935. De réir de Búrca, is sa 'teach is faide siar sa ngleann', teach idir dhá chnoc, i 'nGleann Tréig, Cloich Bhric' a bhí cónaí ar an teaghlach nuair a thug sé cuairt ar Mháirtín. I 1941, bhí mac pósta agus bean a mhic agus a gclann sa teach céanna leis. Tá ábhar béaloidis uaidh ar fáil i gCnuasach Bhéaloideas Éireann, COBÁC. Tá cuntais ag Proinnsias de Búrca ina dhialanna air faoin ainm Máirtín Ó Ceárna (CBÉ, Iml. 343, 25/9/1935.; CBÉ, Iml. 873, 15/7/1941, 20/7/1941).

Foirm Eolais Phearsanta ('Personalbogen')