Nóta beathaisnéise

Brún (de Brún, Browne), Séamus (James) (1911-2003): I gCorr na Móna, contae na Gaillimhe, a rugadh Séamus Brún ar an gcéad lá de mhí Dheireadh Fómhair 1911. Chuaigh sé ar an mbunscoil i gCorr na Móna agus fuair sé scoláireacht a thug go Coláiste Chonnacht, Tuar Mhic Éadaigh, é. Is ansin a cháiligh sé mar mhúinteoir. Go dtí 1944 bhí sé ag teagasc i gcontae Shligigh. Idir 1944 agus 1977 is i Ros Comáin a bhí sé lonnaithe. Bhí sé ina bhall de Chomhaltas Ceoltóirí Éireann (ina uachtarán air 1970-3), de Choiste Oireachtas na Gaeilge, de Chomhairle Raidió na Gaeltachta agus d’Fhianna Fáil. Rinneadh Seanadóir de i 1977. Ball den Phainéal Cultúrtha agus Oideachais a bhí ann le linn 1982-3. Bhí sé ina bhall de Choiste na Gaeilge i dTithe an Oireachtais chomh maith. Bronnadh Gradam an Phiarsaigh air i 1993, Gradam an Oireachtais i 2002 agus Gradam Chomhaltas Ceoltóirí Éireann an bhliain chéanna. Phós sé Bríd Ní Eadhra i 1944. Bhí beirt mhac agus iníon amháin acu. Fuair Séamus bás ar an gcúigiú lá de mhí an Mhárta 2003 in Ospidéal Réigiúnda Luimnigh. Cuireadh é i Reilig Naomh Seosamh sa Chaisleán Riabhach. Tá eolas bheathaisnéise faoi ar Ainm.ie ag http://www.ainm.ie/Bio.aspx?ID=1535. Foilsíodh cuntais iarbháis air in Lá (14 Márta 2003), san Irish Times (15 Márta, 2003) agus in Foinse (16 Márta 2003).

Foirm Eolais Phearsanta ('Personalbogen')